Dem Trump seng Victoire: En Alarmzeeche fir eent vereentent Europa
No der Victoire vum Trump gesäit sech Europa mat ëmmer méi Nationalismus a Spléckung konfrontéiert. Volt fuerdert e vereentent, staarkt Europa, fir dës Erausfuerderung ze meeschteren an eng Zukunft vun der Zesummenaarbecht an der Solidaritéit opzebauen.
Nodeems den Donald Trump bei de Presidentschaftswahlen an den USA alt neess gewonnen huet, si mir op e Punkt komm, wou mer eis déif Gedanke musse maachen. D'Tatsaach, datt populistesch an nationalistesch Ideologien op béide Säite vum Atlantik ëmmer méi Succès hunn, stellt eng eescht Gefor fir d'Wäerter vu Kooperatioun, Solidaritéit an Fridden duer, déi Europa esou schwéier opgebaut huet. Dat ass net nëmmen e Problem vun Amerika – et ass e globale Problem, deen een och an Europa ëmmer däitlech ze spiere kritt.
D'Victoire vum Trump an änleche Bewegungen an Europa weisen eis, wéi staark déi politesch Kräft sinn, déi eis Gesellschafte splécke a schwäche wëllen. Dës Kräft bauen op Angscht an Mësstrauen op, an encouragéieren eng Spléckung amplaz enger Eenheet. Dat ass net de richtege Wee fir eis virun ze bréngen. D’Äntwert op d'Erausfuerderungen, déi mir hunn, ass net méi Fragmentatioun, mä méi Eenheet. Elo nach méi wéi jee muss Europa zesummestoen; mir si méi staark, wa mir vereent sinn, a vulnerabel, wa mir gespléckt sinn.
En Europa, dat zesummenhält, ass keen Luxus – et ass eng Noutwendegkeet. Geopolitesch Onstabilitéit, wirtschaftlech Onsécherheet an Ëmweltkrisen erfuerderen, datt mir mat engem gemeinsaamen Zil handelen. Als gréisste Bannemaart vun der Welt huet Europa d’Kraaft, seng Zukunft ze gestalten, awer nëmmen, wann et vereent bleift. Déi rezent Entwécklungen erënneren eis drun, datt d’global Muechtverhältnisser sech veränneren, an datt Europa seng eegen wirtschaftlech a militäresch Onofhängegkeet opbauen muss. Wann mir dat net maachen, riskéiere mir, dem Drock vun externe Kräft, och déi vun enger USA, déi sech ëmmer méi zeréckzitt, ausgesat ze sinn.
D'politesch Zersplitterung bannent Europa schwächt eis Positioun. Datt n Länner wéi Ungarn, Holland a Frankräich ëmmer méi Nationalismus opkënnt, riskéiert Europa ze splécken an d’Fundamenter vum europäeschen Projet z'ënnergruewen. Dës Bewegunge verspriechen zwar Sécherheet duerch Isolatioun, awer d’Geschicht weist eis, wou esou Weeër hiféieren. Zersplitterung a Spléckung féiert zu Onstabilitéit, zu Konflikter, an zu engem Europa, dat fir extern Manipulatioun ufälleg ass.
Mee et gëtt Hoffnung. D’Geschicht huet gewisen, datt Europa méi staark gëtt, wann et zesummesteet. Mir musse eis nees fir d’europäesch Integratioun engagéieren – wirtschaftlech, politesch a militäresch. De Wee no vir wäert schwireg sinn, mä mir hunn d’Kraaft, e gemeinsam ze goen.
Volt gleeft weiderhin un e vereentent Europa, dat an senger Diversitéit zesummenhält, géint Erausfuerderungen resilient ass, an dat sech dem Fridden an der Kooperatioun verflicht. Mir wäerten déi Kräft, déi eis splécke wëllen, net gewanne loossen. Mir bauen en Europa vun der Zukunft: en Europa vun der Solidaritéit, vum Wuelstand an vum gemeinsame But.
Dës Visioun ka just Realitéit ginn, wann s du och matméchs. Et ass Zäit, datt all déi, déi un d’Kraaft vun engem vereenten Europa gleewen, zesummekommen. Dofir ruffe mir dech op, bei Volt matzemaachen, der pan-europäescher Bewegung fir eng Zukunft vun Zesummenhalt, géigesäitegem Respekt a gemeinsamem Progrès. Zesummen kënne mir d’Erausfuerderunge vun der Zukunft meeschteren, vereent an determinéiert fir en Europa opzebauen, dat staark a sécher an der Welt steet.